Mei Oma hod owei g´sogt, daß da Deife ned feiert
und d´Lumperei hod´s g´sogt, de is tausend Mann schtoak.
Sie sogt daß eam oiss hoamkimmt, wos d´Woifn ned dabeissn
und wannst as z´waid treibst, stengan d´Fensta boid gedoi.

De erscht Liab sogts, des is de best´, de zwoat brennt ned so hoas,
es is a leicht´s Schimpfa, wenn da Anda nix woas.
Wer guad lebt wiad guad schteam sogt´s und deng owei dra,
Guatheid is Dummheid, dua ned mehr ois ma ka.

Ref.:
Ned jeder, der di alocht mecht dei Freind sa,
ned jeder, der di aschreit is dei Feind.
Und wo ma singt loß di ned einfach nieder,
wei aa schlechte Leid ham manchmoi schäne Liada.

Geh ned im Zorn aus´m Haus, wei es is oft scha bassiert,
daß´d nimma kimst und daß di Koana mehr segt.
Vom Deife wenns´t red´st, kast a d´Heandl scha seng
und wenns´t owei s´Mei hoidst, is´s boid um di gscheng.

Ref.:

Eine Sammlung uralter Sinnsprüche
und Weisheiten, deren Bildhaftigkeit
im Lauf der Zeit mehr und mehr
an Bedeutung verliert.
Sprich´

Seitenanfang

Wann i amoi doud bi

Wann i amoi doud bi
dann doat´s enk ned oi
tringt´s liawa a Hoiwe
und tringt´s es aaf mi

Und kafft´s ma kui Bleame
singt´s ma liawa a Liad
wei den wos es okafft´s
han i nia interessiert

Setzt´s ma koan Grobstoa
und mochts ma koa Grob
wei des wos des Plotz braucht
geht da Waid wieda ob

Ref. :
Und bleibt´s ned dahoam weng mia
koa Stund und koan Dog
i daad aa liawa fuatgeh
kint´s ma glaum wos i sog

Kafft´s mia koan scheen Sarg
mei hat´s fei so g´scheid
es duat´s aa a Kistn
weis eh bloß dafeid

Legt´s mia koa schees G´wand a
und kampet´s me ned
grobt´s me ei wia i g´schtoam bi
wei me eh neamd mehr segt

Ref. :

Aus meina Leich mocht´s a Houzat
a Musi lost´s schpain
owa treibt´s es ned goa z´gaach
mei Braut kints a andersmoi schtain

Und sogt´s es mein Weiwee
Sie soid ned recht blearn
wei boid kimt a Neia
und aa den hods dann gean

Ref. :

Seitenanfang

A so g´heats g´mocht

So wia da Noar um d´Semme locht,
so wia da Schmied sei Glanda mocht,
so wia da Becka d´Brezn bocht,
a so g´heats g´mocht.

So wia da Metzga d´Wurscht zuabindt,
so wia a Feia s´Hoiz vabrinnt,
wia jeda Topf sein Deckl findt,
a so g´heats g´mocht.

Ref. :
Ned mit da Dia ins Haus,
ned mit´n Kopf durch d´Wändt,
des bringt da nix.
Ned va hint ag´fangt,
aa ned üwaschpannt,
wei des bringt da nix.

So wia da Bappa d´Mamma mog,
so wia´s liacht wiad Dog fia Dog,
so wia Du lochst ganz ohne Plog,
a so g´heats g´mocht.

So wia da Schnee en Woid zuadeckt,
so wia da Grampus d´Kinda schreckt,
so wia da Gockel d´Leid aafweckt,
a so g´heats g´mocht.

Ref. :

So wia da Bua mit´n Bappa schpait,
so wia´s dahigeht aaf da Waid,
wia Du mi mogst aa ohne Gaid,
a so g´heats g´mocht.

So wia ma guat foaht wenn ma schmiert,
so wiasd de dummet´st wenn´s pressiert,
so wia ma schloft wenn´s finsta wiad,
a so g´heats g´mocht.

Ref. :